✒️ पराग काथार, खबर महाराष्ट्र न्यूज – जळगाव शहरातील एमआयडीसी परिसरातील जी सेक्टरमध्ये असलेल्या विजेता इंडस्ट्रीज कंपनी बाहेर मध्यरात्री झालेल्या गुंडागर्दीच्या प्रकारामुळे परिसरात दहशतीचे वातावरण निर्माण झाले आहे. कंपनीतील कर्मचारी सरफू शेख नाईट ड्युटी संपवून घरी जात असताना ही घटना घडली.
मिळालेल्या माहितीनुसार, सरफू शेख हे कंपनीबाहेरील एका टपरीवर पान-बीडी घेण्यासाठी थांबले असता, शेजारील दुसऱ्या अवैध दारू विक्री टपरीवर राहुल नावाचा तरुण एका व्यक्तीला मारहाण करत होता. त्यावेळी अचानक त्या राहुलने सरफू शेख यांच्यावरही धावून जात त्यांना मारहाण सुरू केली. या घटनेनंतर सरफू शेख यांनी कंपनीतील इतर कामगारांना मदतीसाठी बोलावले.
कामगार बाहेर येताच राहुल आणि त्याच्या साथीदारांनी लाठ्या-काठ्यांनी हल्ला चढवला. दरम्यान, घटनास्थळी उपस्थित असलेल्या एका महिलेने राहुल याला बंदूक दिल्याचे सांगण्यात येत असून, त्याने बेछूट गोळीबार केला.
या गोळीबारात अहमद फिरोज शेख (वय ३६) आणि राजन शेख रफिउल्ला हे दोघे गंभीर जखमी झाले असून त्यांना तात्काळ रुग्णालयात दाखल करण्यात आले आहे. यापैकी एकाची प्रकृती चिंताजनक असल्याचे समजते.
दरम्यान, हल्लेखोर अजूनही परिसरातच थांबले असल्याने कंपनीतील इतर कामगार भीतीपोटी आत लपून बसल्याची माहिती मिळाली आहे. घटनेची माहिती मिळताच पोलिसांनी घटनास्थळ आणि रुग्णालय गाठून तपास सुरू केला. घटनास्थळी काही रिकामे काडतूस आणि एक जिवंत काडतूस आढळून आले आहेत.
रुग्णालयात माजी उपमहापौर करीम सालार यांनी भेट देऊन जखमींची विचारपूस केली. पोलिसांनी आरोपींचा शोध सुरू केला असून पुढील तपास सुरू आहे.
----------------------------------
आपण आपल्या परिसरातील बातमी व व्हिडीओ 8149343743 या क्रमांकावर पाठवू शकता !
📲 व्हाटसॲप ग्रुप जॉईन करा : https://chat.whatsapp.com/HIC8hI6o9FBAlod6RWM7J4
📹 युट्युब चॅनल सबस्क्राईब करा : https://www.youtube.com/@KhabarMaharashtraNews
---------------------------------
✒️ पराग काथार - संपादक
+918149343743
----------------------------------