भूकरमापकाला ४ हजार रुपयांची लाच घेताना रंगेहाथ अटकजळगाव ACB ची मोठी कारवाई, नागरिकांना सतर्क राहण्याचे आवाहन

खबर महाराष्ट्र न्युज, पराग काथार |जळगाव, २६ मार्च २०२५ (प्रतिनिधी): जळगाव जिल्ह्यातील लाचलुचपत प्रतिबंधक विभागाने (ACB) मोठी कारवाई करत भूकरमापकाला लाच घेताना रंगेहाथ पकडले. ही कारवाई एरंडोल तालुक्यातील निंभोरा येथे करण्यात आली. राजेंद्र रमेश कुलकर्णी (वय ४८) असे अटक करण्यात आलेल्या आरोपीचे नाव आहे.

मस्कावद (ता. रावेर) येथील एका ३० वर्षीय शेतकऱ्याने ४ मार्च २०२५ रोजी ACB कडे तक्रार दाखल केली होती. तक्रारदार व त्यांच्या काकांची मस्कावद येथे सामायिक शेतजमीन असून, तिच्या मोजमापासाठी ७ जानेवारी २०२५ रोजी अर्ज करण्यात आला होता.

१८ फेब्रुवारी २०२५ रोजी भूकरमापक राजेंद्र कुलकर्णी यांनी शेतजमिनीचे मोजमाप केले. मात्र, मोजमापाच्या खुणा दाखवण्यासाठी त्यांनी ५,५०० रुपयांची लाच मागितली. तक्रारदाराने पैसे देण्यास असमर्थता दर्शवल्यानंतर, कुलकर्णी यांनी लाच हरभऱ्याच्या स्वरूपात देण्यासही सांगितले. यामुळे तक्रारदाराने थेट लाचलुचपत प्रतिबंधक विभागाकडे तक्रार केली.

तपासणी दरम्यान, आरोपीने लाचेची रक्कम ५,५०० वरून ४,००० रुपयांवर कमी केली.

रंगेहाथ अटक – ACB ची कारवाई

आज, २६ मार्च २०२५ रोजी निंभोरा येथे एका शेताजवळ तक्रारदाराकडून ४,००० रुपये स्वीकारताना भूकरमापक राजेंद्र कुलकर्णी यांना ACB पथकाने रंगेहाथ पकडले.

ही कारवाई लाचलुचपत प्रतिबंधक विभागाचे पोलीस उपअधीक्षक योगेश ठाकूर यांच्या नेतृत्वाखाली करण्यात आली. सहाय्यक फौजदार सुरेश पाटील, पोलीस हवालदार राकेश दुसाने, पोलीस हवालदार अमोल सूर्यवंशी यांनी कारवाईत महत्त्वाची भूमिका बजावली. पोलीस अधीक्षक शर्मिष्ठा घारगे-वालावलकर यांच्या मार्गदर्शनाखाली प्रकरणाचा सखोल तपास सुरू आहे.

नागरिकांसाठी सतर्कतेचे आवाहन

लाचलुचपत प्रतिबंधक विभागाने जनतेला आवाहन केले आहे की, कोणत्याही शासकीय अधिकाऱ्याने लाच मागितल्यास तात्काळ ०२५७-२२३५४७७ किंवा टोल फ्री क्रमांक १०६४ वर संपर्क साधावा.

निंभोरा पोलीस ठाण्यात गुन्हा दाखल

आरोपीविरुद्ध निंभोरा पोलीस ठाण्यात गुन्हा दाखल करण्यात आला असून, पुढील चौकशी सुरू आहे.

----------------------------------

आपण आपल्या परिसरातील बातमी व व्हिडीओ 8149343743 या क्रमांकावर पाठवू शकता !

📲 व्हाटसॲप ग्रुप जॉईन करा : https://chat.whatsapp.com/HIC8hI6o9FBAlod6RWM7J4

📹 युट्युब चॅनल सबस्क्राईब करा : https://www.youtube.com/@KhabarMaharashtraNews

---------------------------------

पराग काथार - संपादक

+918149343743

----------------------------------