खबर महाराष्ट्र न्युज, पराग काथार | जळगाव : शहरातील शाहू नगर भागात एमडी ड्रग्जची मोठ्या प्रमाणात साठवणूक करून विक्री करणाऱ्या तरुणावर शहर पोलिसांनी कारवाई केली. या कारवाईत ५३.४० ग्रॅम एमडी ड्रग्ज जप्त करण्यात आले असून, त्याची किंमत ५ लाख ३४ हजार रुपये आहे. पोलिसांनी या प्रकरणात सर्फराज जावेद भिस्ती (वय-२३, रा. शाहू नगर, जळगाव) याला अटक केली आहे.
गुप्त माहितीच्या आधारे छापा, आरोपी गजाआड
शहर पोलिस ठाण्याचे पोलीस कर्मचारी आनंद निकुंभ आणि प्रफुल्ल धांडे गस्त घालत असताना त्यांना शाहू नगरात एमडी ड्रग्जचा साठा असल्याची गोपनीय माहिती मिळाली. या माहितीच्या आधारे पोलिसांनी २२ फेब्रुवारी रोजी रात्री ९ वाजता छापा टाकला. तपासात आरोपीच्या घरातून दोन पुड्या एमडी ड्रग्ज जप्त करण्यात आल्या. याप्रकरणी जळगाव शहर पोलिस ठाण्यात एनडीपीएस कायद्यांतर्गत गुन्हा दाखल करण्यात आला आहे.
संशयित आरोपी पूर्वीपासूनच गुन्हेगारी प्रवृत्तीचा
तपासादरम्यान उघडकीस आले की, सर्फराज जावेद भिस्ती याच्यावर यापूर्वीही आर्म्स ॲक्टअंतर्गत गुन्हे दाखल आहेत. त्यामुळे तो आधीपासूनच गुन्हेगारी प्रवृत्तीचा असल्याचे स्पष्ट झाले आहे. पोलिस आता त्याने हे ड्रग्ज कुठून आणले, त्याचा पुरवठादार कोण आहे आणि नेमकी कोणाला विक्री करत होता, याचा तपास करत आहेत.
शहर पोलिसांची तत्पर कारवाई, मोठा साठा जप्त
या कारवाईत सहाय्यक पोलीस निरीक्षक शितलकुमार नाईक, पोलीस उपनिरीक्षक भरत पाटील, सुनील पाटील, रणजीत पाटील आणि अन्य पोलीस कर्मचारी सहभागी झाले होते. पोलिसांच्या या तातडीच्या कारवाईमुळे मोठ्या प्रमाणावर एमडी ड्रग्जचा पुरवठा रोखण्यात यश आले आहे.
नागरिकांना पोलिसांचे आवाहन
शहरात अवैधरीत्या सुरू असलेल्या अशा गुन्हेगारी कारवायांविषयी नागरिकांनी तत्काळ पोलिसांना माहिती द्यावी, असे आवाहन पोलिस प्रशासनाने केले आहे.
----------------------------------
आपण आपल्या परिसरातील बातमी व व्हिडीओ 8149343743 या क्रमांकावर पाठवू शकता !
📲 व्हाटसॲप ग्रुप जॉईन करा : https://chat.whatsapp.com/HIC8hI6o9FBAlod6RWM7J4
📹 युट्युब चॅनल सबस्क्राईब करा : https://www.youtube.com/@KhabarMaharashtraNews
---------------------------------
पराग काथार - संपादक
+918149343743
----------------------------------
Tags
क्राईम