गॅस भरणा केंद्र सुरु ठेवण्यासाठी १२ हजाराची लाच घेतांना दोन पोलीस जाळ्यात

खबर महाराष्ट्र न्यूज, पराग काथार - अमळनेर पोलीस ठाण्यात कार्यरत दोन पोलीस कर्मचारी आणि एका खासगी व्यक्तीला लाच घेताना रंगेहाथ पकडण्यात लाचलुचपत प्रतिबंधक विभागाच्या धुळे पथकाला यश आले. गॅस भरणा केंद्र सुरु ठेवण्यासाठी १२ हजार रुपयांची लाच स्वीकारताना ही कारवाई करण्यात आली.

पोलिस अधीक्षक भारत तांगडे, अपर पोलीस अधीक्षक माधव रेड्डी आणि पोलीस निरीक्षक सुनील दोरगे यांच्या मार्गदर्शनाखाली ही सापळा कारवाई करण्यात आली. या प्रकरणात तीन जणांविरोधात गुन्हा दाखल करण्यात आला आहे. यात अमोल राजेंद्र पाटील (वय ३६), जितेंद्र रमणलाल निकुंभे (वय ३३), (दोघेही अमळनेर पोलीस ठाण्यात कार्यरत), उमेश भटू बारी (वय ४६) — खासगी पंटर यांना अटक करण्यात आली आहे. 

तक्रारदार अमळनेर शहरातील धुळे रोड परिसरात, पाचपावली मंदिराजवळ एका टपरीत एलपीजी गॅस सिलिंडरमधून वाहनांमध्ये गॅस भरण्याचा व्यवसाय करतात. या व्यवसायाच्या निमित्ताने अमळनेर पोलीस ठाण्यातील कर्मचारी अमोल पाटील आणि जितेंद्र निकुंभे यांनी तक्रारदाराकडे जाऊन दरमहा १५ हजार रुपयांची लाचेची मागणी केली. त्यांनी सांगितले की, "तुला गॅस भरण्याचा व्यवसाय करायचा असल्यास आम्हाला दर महिन्याला हप्ता द्यावा लागेल, अन्यथा गुन्हा दाखल करू."

तक्रारदाराने ही बाब गंभीरतेने घेत लाचलुचपत प्रतिबंधक विभाग, धुळे यांच्याशी संपर्क साधला. त्यानंतर खात्री करून सापळा रचण्यात आला. तपासादरम्यान दोन्ही पोलीस कर्मचारी लाच स्वीकारण्यास तयार झाले आणि तडजोडीनंतर १२ हजार रुपयांवर सहमती झाली. मंगळवारी झालेल्या कारवाईत, ही रक्कम खासगी पंटर उमेश बारी याच्यामार्फत घेताना तिघेही जाळ्यात अडकले. यानंतर तिघांविरोधात कायदेशीर कारवाई करण्यात आली आहे.

सापळा कारवाईत सहभागी अधिकारी

पोलीस उपअधीक्षक सचिन साळुंखे (सापळा पर्यवेक्षण अधिकारी), पोलीस निरीक्षक पद्मावती कलाल (सापळा अधिकारी), निरीक्षक यशवंत बोरसे, तसेच पथकातील कर्मचारी: राजन कदम, मुकेश अहिरे, प्रवीण मोरे, संतोष पावरा, प्रशांत बागूल, मकरंद पाटील, प्रवीण पाटील, सागर शिर्के, प्रीतेश चौधरी, रेश्मा परदेशी, सुधीर मोरे, जगदीश बडगुजर यांनी कारवाई केली. 

जळगाव जिल्ह्यात गेल्या काही दिवसांपासून लाचखोरीच्या घटना वाढत असून, विविध शासकीय कार्यालयांमध्ये भ्रष्टाचार उघडकीस येत आहे. पोलीस दलातीलच काही कर्मचारी अशा कारवायांमध्ये अडकत असल्याने, कायदा-सुव्यवस्था राखणाऱ्या यंत्रणेबाबत जनतेच्या मनात चिंता व्यक्त होत आहे.