खबर महाराष्ट्र न्यूज पराग काथार - एरंडोल तालुक्यातील कासोदा पोलीस ठाण्याच्या हद्दीतील बांभोरी शिवारात गालापुर रोडलगत सुरू असलेल्या जुगार अड्ड्यावर पोलिसांनी छापा टाकून सात जणांना रंगेहाथ पकडले आहे. या कारवाईत रोख रक्कम, मोबाईल फोन व मोटारसायकली असा एकूण १,६६,०३० रुपयांचा मुद्देमाल जप्त करण्यात आला असून आरोपींवर जुगार प्रतिबंधक कायद्याअंतर्गत गुन्हा दाखल करण्यात आला आहे.
सपोनि. निलेश राजपूत यांना मिळालेल्या गोपनीय माहितीनुसार गालापुर रोडच्या कडेला वाहने उभी करून, नाल्यालगत जमिनीवर बसून काही इसम पैशावर पत्त्यांचा जुगार खेळत असल्याची माहिती मिळाली होती. मिळालेल्या माहितीच्या आधारे त्यांनी तातडीने पोलीस पथक घटनास्थळी रवाना केले. सायंकाळी साडेचारच्या सुमारास छापा टाकून पोलिसांनी सात जणांना जुगार खेळताना रंगेहाथ पकडले.
या कारवाईत शेख फारुख शेख नबी (५०), शेख शहीद शेख रफिक (४०), शेख निजाम शेख सिराज (५२), तस्लीम सुलेमान खान (५७), शेख हमीद शेख शौकत (४३), शेख हमीद शेख अमीर (४०) आणि शेख मुस्ताक खान अमीर खान (६०) सर्व रा. कासोदा ता. एरंडोल, जि. जळगाव यांना ताब्यात घेण्यात आले. त्यांच्या ताब्यातून ३,३८० रुपये रोख, २२,००० रुपये किमतीचे मोबाईल तसेच १,४०,००० रुपये किमतीच्या तीन मोटारसायकली असा एकूण १,६६,०३० रुपयांचा मुद्देमाल पोलिसांनी हस्तगत केला.
या प्रकरणी पोकॉ समाधान तोंडे यांच्या फिर्यादीवरून सातही इसमांविरुद्ध महाराष्ट्र जुगार प्रतिबंधक कायदा कलम १२ (अ) प्रमाणे गुन्हा दाखल करण्यात आला आहे. ही कारवाई पोलीस अधीक्षक महेश्वर रेड्डी यांच्या आदेशानुसार, अपर पोलीस अधीक्षक श्रीमती कविता नेरकर-पवार आणि उपविभागीय पोलीस अधिकारी विजय ठाकुरवाड यांच्या मार्गदर्शनाखाली करण्यात आली. कारवाईत सपोनि. निलेश राजपूत, पोना अकिल मुजावर, पोकॉ समाधान तोंडे, प्रशांत पगारे, कुणाल देवरे आणि योगेश पाटील यांच्या पथकाचा सहभाग होता.
या कारवाईमुळे परिसरातील अवैध जुगार व्यवसायाला मोठा धक्का बसला असून नागरिकांत समाधान व्यक्त केले जात आहे.
Tags
जळगाव