🚨 मुक्ताईनगर-वरणगाव दरोडा प्रकरणाचा पर्दाफाश; एलसीबी जळगावची मोठी कारवाई — पाच सराईत गुन्हेगार जेरबंद, शस्त्रसाठा व रोकड हस्तगत

✒️ पराग काथार, खबर महाराष्ट्र न्यूज | प्रतिनिधी : मुक्ताईनगर व वरणगाव परिसरात झालेल्या सशस्त्र दरोड्याचा अखेर उलगडा झाला आहे. जळगाव जिल्हा पोलिसांच्या स्थानिक गुन्हे शाखेने (एलसीबी) केवळ चार दिवसांच्या अचूक आणि काटेकोर तपासानंतर पाच सराईत आरोपींना अटक केली असून एका विधीसंघर्षीत बालकाला ताब्यात घेण्यात आले आहे. या आरोपींकडून रोकड, गावठी पिस्तुले, मॅगझिन, मोबाईल फोन आणि गुन्ह्यात वापरलेली साधने असा मोठा मुद्देमाल हस्तगत करण्यात आला आहे.

🔹 तीन ठिकाणी सलग सशस्त्र दरोडा

दि. ९ ऑक्टोबर २०२५ रोजी रात्री १० ते ११ वाजेच्या सुमारास बोदवड चौफुली, मुक्ताईनगर येथील रक्षा टोफ्युअल (भारत पेट्रोलियम), कर्की फाटा येथील मनुभाई आशीर्वाद पेट्रोल पंप तसेच वरणगाव शिवारातील सय्यद पेट्रोल पंप (तळवेल फाटा) येथे पाच ते सहा अज्ञात दरोडेखोरांनी मोटरसायकलवर येत बंदुकीच्या धाकावर दरोडा टाकला.

त्यांनी रोख रक्कम, मोबाईल फोन आणि सीसीटीव्ही डीव्हीआर असा एकूण ₹१,३३,५०० किमतीचा मुद्देमाल लुटून नेला. या प्रकरणी मुक्ताईनगर पोलीस ठाण्यात गुन्हा क्र. ३१६/२०२५, कलम ३९७ भा.दं.वि. नुसार गुन्हा दाखल करण्यात आला.

🔹 वरिष्ठ अधिकाऱ्यांचे तत्पर मार्गदर्शन

घटनेनंतर जळगाव जिल्ह्याचे पोलिस अधीक्षक डॉ. महेश्वर रेड्डी, अपर पोलिस अधीक्षक अशोक नखाते आणि भुसावळ उपविभागीय पोलिस अधिकारी संदीप गावीत यांनी घटनास्थळी भेट देऊन तपासाची जबाबदारी स्थानिक गुन्हे शाखेचे वरिष्ठ पोलिस निरीक्षक राहुल गायकवाड यांच्याकडे सोपवली.

त्यांच्या मार्गदर्शनाखाली पोउपनि. शरद बागल, सोपान गोरे, शेखर डोमाळे, जितेंद्र वल्टे आणि श्रेणी पोउपनि. रवी नरवाडे यांच्या नेतृत्वाखाली पाच तपास पथके तयार करण्यात आली. या पथकांनी चार दिवस सलग अहोरात्र मेहनत घेऊन तांत्रिक माहितीच्या आधारे आरोपींचा माग नाशिक आणि अकोला जिल्ह्यांपर्यंत घेतला आणि अखेर सर्व आरोपींना जेरबंद करण्यात यश मिळवले.

🔹 अटक आरोपींची माहिती

१️) सचिन अरविंद भालेराव (३५) — रा. भुसावळ, ह.मु. खकनार, जि. बुर्‍हाणपूर (म.प्र.)

२️) पंकज मोहन गायकवाड (२३) — रा. वेडीमाता मंदिर, जुना सातारा रोड, भुसावळ

३️) हर्षल अनिल बावस्कर (२१) — रा. बाळापूर, जि. अकोला

४️) देवेंद्र अनिल बावस्कर (२३) — रा. बाळापूर, जि. अकोला

५️) प्रदुम्न दिनेश विरघट (१९) — रा. श्रद्धा नगर, कौलखेड, अकोला

६️) विधीसंघर्षीत बालक — अकोला येथून ताब्यात

चार आरोपींना नाशिकहून तर एक आरोपी आणि अल्पवयीन साथीदाराला अकोल्यातून अटक करण्यात आली.

🔹 जप्त केलेला मुद्देमाल

१) रोकड ₹४०,०००/-

२) ३ गावठी पिस्तुले

३)  मॅगझिन ५

४) जिवंत काडतुसे १०

५) मोबाईल फोन ९

६) निळ्या रंगाची सॅक बॅग

असा एकूण १ लाख ३३ हजार ५०० रुपये किमतीचा मुद्देमाल जप्त करण्यात आला.

🔹 मुख्य आरोपीवर पूर्वीचे गंभीर गुन्हे

मुख्य आरोपी सचिन भालेराव हा भुसावळ बाजारपेठ पोलिस ठाण्यातील खुनाचा प्रयत्न आणि दंगा करणे या दोन गंभीर गुन्ह्यांमध्ये आधीच आरोपी आहे. तसेच, २०२३ मध्ये महाराष्ट्र पोलीस कायदा कलम ५५ नुसार त्याला दोन वर्षांसाठी जळगाव जिल्ह्यातून हद्दपार करण्यात आले होते.

🔹 पोलिस दलाचे विशेष योगदान

या कारवाईत वरिष्ठ पोलिस निरीक्षक राहुल गायकवाड यांच्या नेतृत्वाखाली पोउपनि. शरद बागल, सोपान गोरे, शेखर डोमाळे, जितेंद्र वल्टे, रवी नरवाडे, तसेच पोहे. गोपाळ गव्हाळे, प्रेमचंद सपकाळे, उमाकांत पाटील, सलीम तडवी, श्रीकृष्ण देशमुख, विकास सातदिवे, प्रितम पाटील, सुनिल दामोदरे, विनोद पाटील, यशवंत टहाकळे, नितीन बाविस्कर, अक्रम शेख, प्रविण भालेराव, मुरलीधर धनगर, छगन तायडे, प्रशांत परदेशी, राहुल वानखेडे, महेश पाटील, सागर पाटील, भूषण शेलार, सिद्धेश्वर डापकर, प्रदीप सपकाळे, रवींद्र कापडणे, दीपक चौधरी, दर्शन ढाकणे, बाबासाहेब पाटील, प्रमोद ठाकूर, भारत पाटील, मिलिंद जाधव, गौरव पाटील, तसेच भुसावळ बाजारपेठ पोलिस ठाण्याचे पोहे. विजय नेरकर, योगेश माळी, सचिन चौधरी, महेंद्र पाटील, अमर अढाळे, हर्षल महाजन, प्रशांत सोनार, भुषण चौधरी यांनी विशेष परिश्रम घेतले.

🔹 तपास अद्याप सुरू

या टोळीचा इतर कोणत्या गुन्ह्यांशी संबंध आहे का, याचा तपास मुक्ताईनगर पोलिस ठाण्याकडून सुरू आहे. आरोपींच्या मोबाईल फोन व शस्त्रास्त्रांची तपासणी करून आणखी धागेदोरे मिळण्याची शक्यता पोलिसांनी व्यक्त केली आहे

----------------------------------

आपण आपल्या परिसरातील बातमी व व्हिडीओ 8149343743 या क्रमांकावर पाठवू शकता !

📲 व्हाटसॲप ग्रुप जॉईन करा : https://chat.whatsapp.com/HIC8hI6o9FBAlod6RWM7J4

📹 युट्युब चॅनल सबस्क्राईब करा : https://www.youtube.com/@KhabarMaharashtraNews

---------------------------------

✒️ पराग काथार - संपादक

+918149343743

----------------------------------