खबर महाराष्ट्र न्यूज, पराग काथार - राज्यातील आरोग्य व्यवस्था अधिक सक्षमपणे कार्यान्वित करण्यात महत्त्वपूर्ण भूमिका बजावणाऱ्या आशा स्वयंसेविकांनी आपल्या विविध प्रलंबित मागण्यांसाठी आज जोरदार आंदोलन केले. महाराष्ट्र राज्य गटप्रवर्तक व आशा स्वयंसेविका संघटनेच्या नेतृत्वाखाली जळगाव जिल्ह्यातील सुमारे २०० ते ३०० आशा स्वयंसेविका एकवटून जिल्हा परिषदेसमोर भव्य मोर्चासाठी जमा झाल्या.
आज, सोमवारी दुपारी २ वाजता सुरू झालेल्या या मोर्चात आशा स्वयंसेविकांनी "आमच्या मागण्या पूर्ण करा", "शासकीय दर्जा देऊन न्याय द्या", अशा जोरदार घोषणा देत आंदोलनाचा नारा दिला. थकीत मानधनाची तातडीने अदा करावी, शासकीय कर्मचाऱ्यांचा दर्जा द्यावा, कामाचे योग्य मानधन व सन्मान मिळावा, या प्रमुख मागण्यांसह इतर विविध मागण्यांसाठी त्यांनी थाळीनाद करत आपला आवाज बुलंद केला.
आंदोलनादरम्यान संघटनेच्या पदाधिकाऱ्यांनी जिल्हा प्रशासनाला आपल्या मागण्यांचे निवेदन दिले. त्यांनी स्पष्ट शब्दांत सांगितले की, "आम्ही आरोग्य व्यवस्थेचा आधार आहोत. गावपातळीवर काम करत असताना अनेक अडचणींना सामोरे जातो, मात्र त्याचे योग्य मोबदला मिळत नाही. अनेक महिन्यांपासून मानधन थकीत आहे. शासनाने या मागण्यांकडे गांभीर्याने लक्ष दिले पाहिजे, अन्यथा संघर्ष अधिक तीव्र केला जाईल."
या आंदोलनामुळे प्रशासनाला आशा स्वयंसेविकांच्या मागण्यांकडे लक्ष द्यावे लागेल, अशी अपेक्षा संघटनेने व्यक्त केली आहे. आंदोलक महिलांचा उत्साह, शिस्तबद्धतेने केलेले आंदोलन आणि त्यामागील स्पष्ट मागण्या पाहता, या विषयाला लवकरच राजकीय व शासकीय पातळीवर गांभीर्याने विचार मिळण्याची शक्यता आहे.
प्रमुख मागण्या:
शासकीय कर्मचाऱ्यांचा दर्जा मिळावा
थकीत मानधन तातडीने अदा करावे
कामाचे योग्य मोबदला व सन्मान मिळावा
आरोग्य सुविधांच्या उन्नतीसाठी आशा स्वयंसेविकांचे योगदान मान्य करावे
----------------------------------
आपण आपल्या परिसरातील बातमी व व्हिडीओ 8149343743 या क्रमांकावर पाठवू शकता !
📲 व्हाटसॲप ग्रुप जॉईन करा : https://chat.whatsapp.com/HIC8hI6o9FBAlod6RWM7J4
📹 युट्युब चॅनल सबस्क्राईब करा : https://www.youtube.com/@KhabarMaharashtraNews
---------------------------------
पराग काथार - संपादक
+918149343743
----------------------------------
Tags
जिल्हा परिषद जळगाव